Kingston Wi-Drive — შიგთავსის გაზიარების ახალი გზა

თუ თქვენს აიპედზე, ან აიფონზე დისკური სივრცე შემოგაკლდათ, ხოლო წასაშლელად არაფერი გემეტებათ, შემიძლია შემოგთავაზოთ ერთი ვარიანტი, რომელიც ვფიქრობ, რომ დაგაინტერესებთ. ეს გახლავთ გარე მუდმივი მეხსიერება Kingston Wi-Drive, რომლის ძირითადი განმასხვავებელი მომენტი არის ამ დისკთან Wi-Fi-ს მეშვეობით დაკავშირება. იდეა ახალი არ არის, რათქმაუნდა, მაგრამ მოდი ჩვენ ამჯერად ეს კონკრეტული მოდელი განვიხილოთ.

გარეგნულად ხისტი დისკი სასიამოვნოდ გამოიყურება — გლუვი ზედაპირი, მორმგვალებული კუთხეები, ლოგო და მრავალფუნქციური ღილაკი გვერდითა წიბოზე — არაფერი ზედმეტი. ზომებით Kingston Wi-Drive iPhone-ს ჰგავს, თუმცა წონით გაცილებით ნაკლებია (თუ შევადარებთ iPhone 5-მდელ მოდელებს). ზომები შემდეგია: 121.5×61.8×9.8 მმ. მეხსიერების მოცულობა 16-დან 64 გბაიტამდეა.

კომპლექტში შედის USB-კაბელი, Mac, ან PC-კომპიუტერთან მისაერთებლად, მომცრო ზომის სახელმძღვანელო. მოწყობილობის დამუხტვა USB-პორტიდან ხდება.

მოდი ახლა მისი პრაქტიკული გამოყენების ნაწილზეც გადავიდეთ. Wi-Drive შეგვიძლია გამოვიყენოთ, როგორც ჩვეულებრივი USB-დისკი, თუმცა მისი მთავარი ხიბლი მაინც სხვა რამეშია. ჩართვის შემდეგ Wi-Drive ქმნის საკუთარ Wi-Fi ქსელს, რომელთანაც მიერთება შეგიძლიათ თქვენი მოწყობილობიდან, წინასწარ ამ მოწყობილობაში სპეციალური აპლიკაციის დაყენების შემდეგ.

ერთდროულად შესაძებელია სამი მომხმარებლის მიერთება, რაც სრულიად საკმარისია იმისათვის, რომ მეგობრებს, ან ოჯახის წევრებს გაუზიაროთ სასურველი შიგთავსი. იმისათვის, რომ უცხო არავინ მიუერთდეს ამ ქსელს, შეგიძლია პაროლი დაადოთ და ამით დაიცვათ.

აპლიკაციას, რომელიც App Store-იდან ყენდება თქვენს მოწყობილობაში, შეუძლია შემდეგი ტიპის ფაილების აღქმა:

აუდიო: aac, mp3, wav
ვიდეო: m4v, mp4, mov
გამოსახულება: bmp, jpeg, jpg, png

იმ შემთხვევაში, თუ ფაილის ფორმატი უცნობია, აპლიკაცია შემოგთავაზებთ მის გახსნას თქვენს მოწყობილობაზე არსებული სხვა რაიმე აპლიკაციით. საერთო ჯამში Wi-Drive-ის აპლიკაცია თავის ფუქნციებს კარგად ასრულებს.

დასკვნა ამ მიმოხილვისა შემდეგია. Kingston Wi-Drive შეგვიძლია ვურჩიოთ iOS და Android-მოწყოილობების მფლობელებს, როგორც მეხსიერების გაფართოების ხელმისაწვდომი საშუალება. ზომები და წონა იმის საშუალებას იძლევა, რომ უპრობლემოდ ვატაროთ ჩანთით, ან თუნდაც ჯიბით. ერთი დამუტვით მოწყობილობა 4 საათი მუშაობს, რაც ფილმის საყურებლად სრულიად საკმარისია. ერთადერთი მინუსი, რაზეც გავამახვილებდი ყურადღებას, არის ფაილების სისტემა FAT32, რაც ფაილის ზომაზე მკაცრს ლიმიტს აწესებს 4 გბაიტის ფარგლებში.