ბოლო წლებში ეფლის დაინტერესება ელექტრონული გადახდის სისტემებით საგრძნობლად გაიზარდა. Apple Pay და Apple Cash უკვე პოპულარული გადახდის საშუალება ხდება კომპანიის ეკოსისტემაში ჩართული მომხმარებლისთვის. როგორც ჩანს, ეფლი ამაზე გაჩერებას არ აპირებს და აკვირდება ისეთ ტექნოლოგიებს, რომლებსაც აქვთ პოტენციალი გახდნენ სამომხმარებლო ბაზრის სტანდარტული გადახდის მეთოდები მომავალში, კერძოდ კი ბლოკჩეინი და მასზე დაფუძნებული კრიპტოვალუტა. რამდენიმე დღის წინ ჯენიფერ ბეილიმ, რომელიც Apple Pay-ს უძღვება კომპანიაში, CNBC-სთან ინტერვიუში აღნიშნა, რომ “ისინი აკვირდებიან კრიპტოვალუტას, მის შესაძლებლობებს და თვლიან, რომ არის ძალიან საინტერესო და აქვს საკმაოდ კარგი სამომავლო პოტენციალი”. ბეილის არ უთქვამს აპირებს თუ არა ეფლი საკუთარი კრიპტოვალუტის გამოშვებას თუ მის ეკოსისტემაში უბრალოდ კრიპტოვალუტის მხარდაჭერა ინტეგრირდება, მაგრამ ეფლისთვის ამ ბაზარზე შესვლა საკმაოდ ლოგიკური ჩანს, რადგანაც კომპანიას უკვე გააჩნია საკუთარი ფინანსური გადახდების ინფრასტრუქტურა და სამომხმარებლო ბაზარზე ყველაზე მაღალი დონის უსაფრთხოება და პრივატულობის დაცვა.
თუმცა უნდა აღინიშნოს, რომ ჯერ ეფლი არანაირი ფორმით არაა ჩართული კრიპტოვალუტის ინდუსტრიაში და ეპსტორში კრიპტოსაფულეების გარდა სხვა დანიშნულების აპლიკაციები არაა წარმოდგენილი.
