Bloomberg-ის თანახმად, Apple-ი წელს iOS-სა და iPadOS-ში დიდ ცვლილებებს შემოგვთავაზებს. კომპანია სიახლეების შესახებ WWDC-ზე 7 ივნისს გვიამბობს, თუმცა განახლებას სექტემბრის ბოლოს მივიღებთ. 7 ივნისიდან სექტემბრამდე განხორციელდება მუდმივი ტესტირებები, სადაც დეველოპერები და მათ შორის გემუგის წევრებიც მიიღებენ მონაწილეობას.
ახალი მახასიათებლები iOS 15-ში
ცხადია, სინამდვილეში გაცილებით მეტი სიახლე იქნება, ვიდრე ჩვენ ახლა გეტყვით, თუმცა აქ წარმოდგენილია ისინი, რაც უკვე ვიცით:
— შეტყობინებების ფილტრები არსებული სტატუსის საფუძველზე. ახალი პარამეტრების მიხედვით, მომხმარებლებს შეეძლებათ შეტყობინებების სისტემის კონფიგურაცია ხმების დაყენებით ან ჩახშობით. ახლა შესაძლებელი იქნება პრიორიტეტების მინიჭება კონკრეტულ შეტყობინებებზე და მათი დაჯგუფება;
— საწყისი ეკრანის განახლება. IPadOS 15-ში iPad-ები საბოლოოდ მიიღებს იმ ვიჯეტების მხარდაჭერას, რომლებიც iOS 14-ში იყო დანერგილი. Bloomberg-ი არ გვთავაზობს სხვა დეტალებს, მაგრამ განმარტავს, რომ ეს იქნება ყველაზე დიდი განახლება iPad-ის სამუშაო მაგიდისთვის 2010 წლის შემდეგ;
— სწრაფი წვდომა კონფიდენციალურობის პარამეტრებზე. Apple-ი ყოველთვის დიდ მნიშვნელობას ანიჭებდა თავისი მომხმარებლების უსაფრთხოებას, მაგრამ iOS 15-ში იქნება სპეციალური მენიუ, სადაც შეგიძლიათ ნახოთ ყველა იმ მონაცემების სია, რომლებსაც აპლიკაციები აგროვებს, გამორთოთ ისინი ან მოირგოთ თქვენი შეხედულებისამებრ;
— დაბლოკილი ეკრანი განახლდა. მართალია რთულია ზუსტად იმის თქმა თუ რა იქნება, თუმცა სავარაუდოდ, კუპერტინოელები გეგმავენ გააფართოვონ შესაძლებლობები, რაც მომხმარებლებს საშუალებას მისცემს ჩართონ გარკვეული ფუნქციები დაბლოკილ ეკრანზე ან მოახდინონ მისი მორგება საკუთარი გემოვნებით;
— iMessage-ი ემსგავსება სოციალურ ქსელს. Apple-მა საბოლოოდ გაიხსენა თავისი მესენჯერის არსებობა, რომელიც ბევრი თვალსაზრისით ჩამოუვარდება WhatsApp-ს. წელს კუპერტინოელები გეგმავენ გააფართოვონ შესაძლებლობები და აქციონ იგი ერთგვარ სოციალურ ქსელად;
რაც შეეხება iPadOS 15-ს, მოგეხსენებათ Apple-მა ახლახანს გაგვაოცა და iPad-ში M1 პროცესორი გამოიყენა, რაც ავტომატურად ნიშნავს რომ iPadOS 15-ში დიდი განახლებები უნდა ვიხილოთ. მარკ გურმანის აზრით, iPadOS 15-ში მარტივი გახდება App Store-ის გვერდის ავლით პროგრამების დაყენება, ისევე როგორც ეს Mac-ის შემთხვევაში ხდება.
თქვენ რომელ ფუნქციას იხილავდით iOS 15-ში? დაგვიწერეთ კომენტარებში ????
