როდის გამოვა iPhone 14 და რა ეღირება?

როგორც იცით Apple-ი სტანდარტულად ახალ iPhone-ებს სექტემბრის დასაწყისში წარადგენს ხოლმე, ხოლო გაყიდვები წარდგენიდან დაახლოებით 10 დღეში იწყება. წელს ტრადიცია სავარაუდოდ დაირღვევა და გაყიდვების დაწყება გადაიდება.

მიზეზი, არსებული რთული გეოპოლიტიკური ვითარებაა. ჩინეთის ხელისუფლების ახალი კანონების მიხედვით, იკრძალება გადაზიდვის დოკუმენტებში სახელების „ტაივანის“ ან „ჩინეთის რესპუბლიკის“ გამოყენება.

Apple-ის ქარხნებმა ჩინეთში შესაძლოა დიდი რაოდენობით კომპონენტები ვერ მიიღონ. ამის გამო, ჩინეთის ქარხნებში შესული კომპონენტები, უკან ტაივანში უნდა დაბრუნდეს და დოკუმენტები ხელახლა დაიწეროს.

ასეთი ვითარების გამო, Apple-მა პირველად ისტორიაში, ჩინეთთან ერთად ინდოეთშიც დაიწყო iPhone 14-ს წარმოება. აქამდე სხვა ქვეყნებში წარმოება მხოლოდ ჩინეთში დაწყებიდან რამდენიმე თვეში ხდებოდა ხოლმე.

Apple-ის ღონისძიება

iPhone 14-ს წარმოებასთან დაკავშირებული პრობლემების მიუხედავად, Apple-მა უკვე დაიწყო ღონისძიების ჩაწერა. როგორც ზოგიერთ წყაროში იწერება, სავარაუდო თარიღი 13 სექტემბერია და ის კვლავ ცარიელი ტრიბუნებით გაიმართება.

ამ შემოდგომაზე ორ ღონისძიებას ველოდებით, სექტემბერში სადაც მთავარი პროდუქტები iPhone 14 და Apple Watch 8 იქნება, ხოლო მეორეს ოქტომბერში, სადაც მთავარი პროდუქტები Mac-ი და iPad-ი იქნება.

რა ეღირება ახალი iPhone-ი?

წარმოების სირთულეების მიუხედავად, ტიმმა გადაწყვიტა რომ საბაზისო მოდელებზე ფასი არ გაზარდოს, ამ შემთხვევაში იგულისხმება iPhone 14, ხოლო რაც შეეხება iPhone 14 Pro-სა და Pro Max-ს, მათი ფასი გაიზრდება: 1099 და 1199 დოლარი.

iPhone 14 – 799 დოლარი;
iPhone 14 Max-ი — 899 დოლარი;
iPhone 14 Pro — 1099 დოლარი;
iPhone 14 Pro Max — 1199 დოლარი;